張秀文被金剛嫌棄太密實

張秀文、金剛及阮小儀昨日以和服打扮，出席新節目《街坊廚神舌戰東京》宣傳活動，雖然張秀文出名身材好，但竟遭金剛嫌棄，「金剛當我係兄弟，我唔係佢杯茶！可能佢鍾意女仔嬌嗲，覺得馴服唔到我。」

昨日打扮密實的張秀文笑言，金剛經常叫她穿得性感些。「佢冇嫌我身材，仲話我身材OK，但覺得我喺節目着得太多衫，話唔靚，所以我哋係性格不合，同身材無關。」她爆料指金剛經常對她講男人經，「有時佢會講鹹濕笑話，去到日本又會影成人玩具相畀我睇，但就冇送畀我。」

金剛戒煙暴脹30磅

金剛早前成功戒煙，但體重迅即由72公斤暴增至85公斤，胖了足足兩個碼。問他是否與舊愛陳蕊蕊分手後自暴自棄？他笑說：「我冇，亦冇後悔戒煙，戒咗健康好多，條氣都順咗！」提到再與小儀到日本拍攝，身旁的小儀即指金剛廣東話退步了，金剛聞言說：「可能肥到鈍咗。」

撰文：李潔盈

編輯：黃寶恩

設計：梁政敏