詠藜園授家傳秘方 免息借錢助年輕人開舖

近年香港年輕人鍾意創業，尋找屬於自己的一片天。憑一碗擔擔麵揚威海外的「詠藜園」，早前就宣布開辦「千歲擔擔麵店」，招攬有志喺餐飲業展拳腳的年輕人，表現好仲可以提供免息貸款協助創業。但老闆娘楊王小玲噚日就好失望咁話，有兩名學員工作3天後便辭職，本來打算打退堂鼓，最終決定再畀年輕人多一次機會，推出「創業先鋒先導計劃」。

培圳兩年 實習不同崗位

呢次計劃不同之處在於，學員要先通過一星期的「觀察期」，畀雙方觀察是否適合，仲會有1個月的「適應期」，令學員有足夠時間適應餐廳的流程和工作，然後會與學員家人見面，清楚講解內容後才在律師見證下簽約。

楊太話詠藜園真係好有誠意幫年輕人創業，學員要經過兩年培訓，第一年會喺總店接受資深員工嘅訓練，學習不同手藝，亦可以按興趣分派到樓面、麵檔及廚房等不同崗位，仲會獲傳授詠藜園嘅家傳秘方。完成培訓後，學員可獲免息貸款，以5人為一組創業開店，初時員工股權佔30％，其後慢慢可以提升至最高的49％，利潤分配最高亦可享80％。

另外，詠藜園下月23日起會正式推出下午茶時段，由資深廚師帶領學員共同營運，扣除材料費後，其餘全歸學員及廚師平分。