黛安
黛安

Mart in Hong Kong 摩天輪年宵新體驗

發佈時間: 2017/01/03

Mart in Hong Kong 摩天輪年宵新體驗

黛安每年都會去行年宵湊熱鬧,但如果覺得傳統年宵唔夠潮,黛安有好介紹呀!中環海濱本月24至27日將會舉行首個大型年宵「摩天輪年宵2.0(Mart in Hong Kong)」,有成80幾個攤檔,劃分生活品味、餐飲美食、乾貨、酒吧暢飲同兒童遊樂區,啱晒一家大細去呀!

年宵又點少得食好嘢,場內會有米芝蓮美食、日本美食專區、街頭小食,一應俱全,據公關朋友講,部分餐廳仲未正式開業,大家可於場內先睹為快,真係好心急想去呀!加埋創意手作、本地藝術品等的參展商,實行集齊「食買玩」元素,迷人摩天輪加上醉人維港,誓必成最潮年宵新去處!大型年宵會同手機應用程式timable合作,市民可以收到第一手的參展商資訊、現場表演時間等,亦可於官方網頁內的E-Mart(網店),搶先購買限定精品,睇嚟黛安出發前要上官方網頁尋寶先!

旺角MOKO搞室內年宵 88元歎阿一鮑魚

新年咁高興,優惠唔好停!旺角MOKO新世紀廣場今個星期五(6日)至1月27日,再次舉辦室內年宵市場,攤位由去年的5個倍增至13個,優惠包括88元歎阿一紅燒元貝鮑魚、安記金牌厚花菇低至55折、限定鋒味曲奇褔袋,仲有好多至潮的衣飾低至一五折發售,聽到都蠢蠢欲動想出發喇!記得玩埋「新春搶鮑山」遊戲,贏走限量版新西蘭鮑魚!

撰文: 黛安 消息特靈八卦公關
欄名: 八卦名利場