坤哥冧莊「最喜愛男歌手」被噓 樂迷：《叱咤》送佢一程

2015年創造樂壇神話的吳業坤（坤哥），去年未能承接氣勢，但前晚卻爆冷蟬聯商台「叱咤樂壇我最喜愛的男歌手」，賽果觸動網民神經，有樂迷高喊陳柏宇（Jason）大熱倒灶無天理；有人則力挺坤哥默默耕耘實至名歸！

《2016年度叱咤樂壇流行榜頒獎典禮》前晚曲終人散，2015年成功「彈起」的坤哥成為爭議性人物，去年他僅開了一場處男紅館騷，表現未算太突出，但也憑《百姓》打入叱咤十大推介第五位，更力壓張敬軒、陳柏宇蟬聯「叱咤樂壇我最喜愛的男歌手」。賽果宣布一刻，場內傳出不少噓聲，坤哥亦「天然呆」，在台上口窒窒未有發表得獎感言。事實上，坤哥領取歌曲獎時已表現緊張：「好多謝網民又好市民又好，所有人…送咗我一程…好漂亮嘅旅程。我上咗一架越速嘅紅Van，去咗好多地方，呢一刻係時候落車。」

事後坤哥在慶功宴上直言：「我真係冇諗過攞男歌手，所以攞歌曲獎嗰陣盡快講晒自己嘅感受！」

陳柏宇：真心開心

其實，入行十年的陳柏宇在年尾開騷後氣勢強勁，早前張敬軒在社交網宣稱在「我最喜愛」投票給Jason，KOL瓊姐亦經常出Po幫手造勢，輿論一致認為陳柏宇有望在《叱咤》揚威，豈料他只獲「叱咤樂壇男歌手」銀獎。很多網友也寸爆《叱咤》造假，疑以擺坤哥上枱；有粉絲則對坤哥投下信心一票，勸告他繼續唱好歌。

一晚過去，坤哥昨日於社交網發言，開名感謝其音樂上的幕後團隊。他並說：「心底裏大家對我都是重要，因為無大家就無今日，請原諒我的個性，希望你們會明白，繼續陪我上。」至於Jason似乎未有感到不滿，昨日Po相分享得獎喜悅，感激同事、粉絲及女友，豪言眾人才是其人生最重要的獎項：「真心開心！今年能夠喺大家心中佔一位置，我好榮幸。」

撰文：Steven、Pat

編輯：黃寶恩

插圖：何樂

設計：梁政敏