黛安
黛安

大玩老香港情懷 癲噹變身財神來賀歲

發佈時間: 2017/01/04

大玩老香港情懷 癲噹變身財神來賀歲

幾時都話做香港人最幸褔,過完西曆新年,農曆新年又嚟緊啦﹗又係時候準備開年活動,畀一家大細開心歡度新歲。

黛安就一早Mark實咗嚟緊喺荷里活廣場的新年活動,點解?因為本土代表卡通人物「癲噹」就任新一任「財爺」—首度以財神造型亮相,仲有係雞年先搶閘出世的新朋友「雞蛋仔」一齊同大家拜年,夠晒盞鬼又獨家,新一年率先搶盡風頭﹗

公關姐妹仲話,到時商場仲會整間「懷舊戲院」,有齊巨型花牌、人力車、雞蛋仔檔同蔗汁檔呢啲老香港布置,啱晒潮拍賀年照片,今個月13日起有得影。

癲噹仲會帶住朋友仔逢周六、日同年廿九、年三十晚大巡遊,同巿民拜年同派利巿﹗大會仲安排咗藝術家即場教小朋友畫Q版漫畫揮春,6歲以上就可以玩,只要喺商場消費滿100蚊就可以參加,要自家製揮春話咁易啦。

時代廣場 睇粵劇慶新春

講開老香港情懷,睇大戲依家都變潮流!時代廣場就趁新年搞咗個「過年睇粵劇」活動,除咗本月14日起有折子戲,仲有拜年照相館畀大家用互動系統投影,一身戲服造型登台打卡同拍埋片,用嚟拜年就sure win啦﹗

撰文: 黛安 消息特靈八卦公關
欄名: 八卦名利場