海洋公園推Fushion套餐 賀40周年大日子

海洋公園下個禮拜就踏入40周年啦，為隆重其事，佢哋由下周二（10日）起為期一年，喺海龍王餐廳、冰極餐廳、海洋冰室、大熊貓餐廳和水都餅店提供「經典尋新四十載」套餐及多款單點菜式，會加入西式元素玩fushion，好似海龍王餐廳、冰極餐廳嘅套餐主菜係「龍蝦碗仔素翅」，用環保澳洲龍蝦肉加入冬菇及黑木耳等，提升鮮味，令街邊小食都變成好高級。

另一主菜選擇是「燴牛仔面頰肉配煎腸粉」，用港人最愛嘅點心煎腸粉，配入口即溶嘅燴牛仔面頰肉，加上雜菜、番茄及白酒調製嘅醬汁；「油浸鴨腿伴燴紅椰菜配糖醋汁」則用法式烹調手法，用鴨油浸封鴨腿再慢煮，食落皮脆肉嫩。

黛安都知姊妹們最重視甜品，呢兩個套餐嘅甜品係「麥芽糖夾餅配雲呢拿雪糕」，用Haagen-Dazs雲呢拿雪糕做點綴；「黑菌蜜糖馬仔」糅合中式甜點馬仔和歐陸高級食材黑菌，口感十足；而「金箔桂花大菜糕」外形更是閃閃發亮，啱晒相機食先嘅姊妹。每份套餐都有一杯經典黑牛特飲，以可口可樂及Haagen-Dazs朱古力雪糕製成。

其他餐廳都有「香港名菜」，包括「海鮮西多士配黑菌蜜糖」、「龍蝦炆伊麵」、「手撕豬肩肉蔥花卷」、「無花果西米焗布甸」。指定小食亭仲有限量版「四十周年威威老友記別注版珍寶杯」，上層放滿特色小食，下層則有40安士的飲品杯，大家記得去食呀！