孖林海峰合作 祖兒影海報極速收貨

容祖兒首個side track騷《JOEY.MY.SECRET.LIVE演唱會》將於3月尾舉行十場，早前祖兒邀請了林海峰（Jan）為其演唱會擔任海報創作總監，意想不到，第一次合作就創下了半小時最快影完一張海報的紀錄。

為順利完成拍攝，祖兒買了大量新衫，Jan則為祖兒準備了大量不同品種鮮花，祖兒謂Jan個人好神秘，一直不肯透露怎樣拍攝，即使去到現場也見不到海報的內容，更表示想不到Jan會用鮮花跟她混合在一起，呈現一個優雅高貴的畫面。最終只花了十分鐘時間已拍攝完畢，創了最快影完一張海報的紀錄，令她既開心又滿意。祖兒說︰「最難忘係影影下，佢問我可唔可以大露背，於是第二張相我幾乎無乜着衫去影，原來佢想將花同我個人混埋一齊，混合咗後又真係好靚。」

另外，祖兒笑言新衫全部無用武之地，會拿去時裝店退貨。Jan亦不諱言其實早已有定案，帶來的衫只是多個選擇而已。Jan又謂今次其實好有難度，因為祖兒甚麼造型也幾乎試過，不過她將舞台設計的圖樣給Jan看，跟他講整個騷的意念是一個私密花園，於是他就藉着綫索去構思，希望身為當事人的祖兒滿意。

紀念入行18年

今次在演藝學院開騷，祖兒表示其實已經期待了六年︰「我出咗60幾張唱片，開過七次演唱會。每一次都有好多歌迷話，呢首又唔唱，嗰首又唔唱，六年前我已經好想開一個騷，唱一些自己好有感覺嘅歌。2017年又正好係我入行18年，就無再諗咁多，可能好多歌手覺得我傻咗，開細場做十場，等於一場紅館咁上下，但自己就要多出十倍力，但我覺得唔同場有唔同感受，諗起都興奮，唯一少少擔心把聲會唔會太攰。」

撰文︰Pauline

編輯：林梓添

設計：梁政敏