【聲明】港生活網站並無進行電話推廣活動

新春利市封巡禮 玩3D投影 向親友拜年

發佈時間: 2017/01/06

農曆新年話咁快就嚟到,派利市係重要環節,除咗換定銀紙之外,有個靚靚利巿封,收到都特別高興!黛安呢排就聽到唔少商場公關姐妹講,今年啲利巿封勁靚、勁cute、手感勁好之餘,仲可以同利巿封玩埋遊戲!

親朋新春歡聚唔少得攻打四方城,朗豪坊就出咗「十三么利巿封」送埋麻將貼紙仔,畀你自己黏出最好意頭嘅靚牌,夾埋真牌用嚟竹戰最開心!消費滿500蚊就換到,贏到開巷話咁易。

利巿封除咗靚,都可以好高科技,新城巿廣場就推出咗3D Hologram效果嘅利巿封,只要用埋利巿封上的投影膠片,就可在手機熒幕度投影3D影像,好似親身到場向親友拜年一樣。用電子貨幣買夠1,500蚊就有得換,仲可即場拍埋30秒賀年短片畀親友!

要睇得又摸得,可以揀荷里活廣場嘅趣致雞丁利巿封,唔好睇佢只係「平平有雞」,摸上手原來小雞圖案都係用硅膠製造,手感超正,仲可以將雞仔撕出嚟留念,夠晒環保,用電子貨幣購物滿1,000蚊就可以換。

打開利巿封都可以好互動,MCP新都城中心今年就設計咗套Chicky家族利巿封,有齊爸爸媽媽囝囝,一打開雞仔圖案就會隨之升起,「步步高陞」仲使乜用口講吖?用電子貨幣買夠680蚊就有得換!

撰文: 黛安 消息特靈八卦公關
欄名: 八卦名利場