【聲明】港生活網站並無進行電話推廣活動

吉野家推新品 潮食黑松露

發佈時間: 2017/01/06

黛安知道唔少打工仔都鍾意去吉野家食午餐同下午茶,貪佢抵食又好味,而且仲間唔中搞搞新意思箍客。公關姊妹話,吉野家將推出全新製品「黑松露芝士豚肉飯」,平時黛安試得多芝士牛丼,但配黑松露醬食嘅豚肉飯,你又試過未?

吉野家罕有採用矜貴食材-有「餐桌上的黑鑽石」之稱嘅黑松露醬,灑上美國車打芝士醬同埋意大利巴馬臣芝士粉,配搭黑白牛奶,製成特濃芝士醬,多層口感,芝味十足,要畀食客喺平民飯堂食到一試難忘嘅味道!豚肉方面,就選用出名肉質細嫩、脂肪分布均勻適中的歐洲肉,誓要用「黑」色「芝」味風靡姊妹們咁話喎。

「黑松露芝士豚肉飯」本月7日(周六)起喺全綫分店推出(中港薈、紅磡置富都會及香港站分店除外),午餐時段起供應,加配汽水、日本茶或者麵豉湯,承惠港幣42元。順帶一提,個飯限量推出,售完即止,真係手快有、手慢無!

撰文: 黛安 消息特靈八卦公關
欄名: 八卦名利場