【聲明】港生活網站並無進行電話推廣活動

向魏綺珊夫婦偷師 項明生上郵輪開Show!

發佈時間: 2017/01/13

「旅遊達人」項明生(James)足迹遍布全世界,呢排佢又有新搞作,原來佢將會喺今個月20日出發嘅郵輪「雲頂夢號」表演,佢會將過去20本旅遊著作、5部電視旅遊節目、1,500篇旅遊專欄、25年旅遊120國的體驗精華,濃縮成90分鐘《穿越時空環球秀》,載歌載舞同大家「講故仔」,21號晚只演一場!

25年經驗濃縮90分鐘

James同黛安講,佢準備咗六套喺世界五大洲搜集返嚟嘅民族服飾,準備當晚「變身」,向觀眾展現佢第一身環球探險經歷,加上多媒體製作,由人類大遷徙出走非洲、發現六大古文明、航海大發現、探索南北極等經典時期講起,要將當晚變成娛樂兼知性之夜咁話喎!

佢仲積極備戰,特登向「糊塗戲班」創辦人魏綺珊、陳文剛夫婦偷師,學習舞台肢體語言,包括點樣站立、演唱、掌握節奏、運用眼神、同觀眾互動等;又經老友查小欣介紹,向有「小鄧麗君」之稱嘅著名歌唱老師單紫寧學唱歌,用西班牙語唱南美洲名曲《Guantanamera》、用英文唱《Amazing Grace》、用日語和老師合唱鄧麗君名曲《我只在乎你》。

James話之前冇做過類似表演,所以今次係「處男下海」!佢仲話陳文剛老師要求佢用自己嘅「氣場」hold住控制全個劇院,因太過抽象,學完都唔知有冇掌握,要知當日觀眾反應先有定奪。

撰文: 黛安 消息特靈八卦公關
欄名: 八卦名利場