星爺現身果欄宣傳新戲 吳亦凡粉絲冒險追星

周星馳監製的賀歲片《西遊伏妖篇》即將上映，昨日星爺與導演徐克和演員吳亦凡到油麻地果欄進行宣傳活動，吳亦凡的出現，吸引幾百名女學生圍觀，更一度逼到出馬路。星爺則搞笑反問宣傳人員，活動為何取名「《西遊》送西柚」，感覺相當奇怪！

為宣傳新作，平日甚少公開亮相的星爺亦親臨果欄，加上有人氣急升的吳亦凡出現，活動未開始，約300名女粉絲已幾乎逼爆果欄，大部分更是穿上校服追星，她們不惜企到店舖對面馬路的石壆，導致險象環生，幸好警方趕到維持秩序。而大會預先安排100名戲迷獲三位嘉賓送上西柚及一封附有$10戲票現金券的利市。

活動於昨午一時舉行，適逢午飯時間，湊熱鬧的市民逼滿果欄外圍，當周星馳、徐克及吳亦凡現身時，全場一片尖叫聲，震耳欲聾，更多次出現人車爭路場面，及後三位嘉賓到果欄內派西柚，更令附近一帶擠得水洩不通，影響多個生果檔做生意，老闆們都登時黑面，又警告fans若整爛生果需照價賠償。

新版唐僧識功夫又搞笑

期間大會安排三人Chit Chat，星爺突然問大會︰「今次呢個《西遊》送西柚都唔知邊個諗出嚟？」主持隨即回應︰「聽聞係你諗喎。」星爺立刻駁斥︰「唔關我事，呢啲『咁好嘅蹺』點會係我諗出嚟呀！」似暗寸活動搞手。

活動上，司儀提到戲中的愛情元素，星爺表示導演最耍家，徐克就笑言︰「我將你嘅私人愛情史拍晒出嚟。」

吳亦凡首次與兩位影圈猛人合作，他坦言很開心，並以廣東話稱︰「就算要我剃頭演出都好開心，我唔係好靚仔，但佢哋搵我拍一啲都無猶豫。」又表示片中飾演的唐僧既懂功夫又會搞笑，對自己是很大挑戰。

採訪︰Pauline

編輯︰黃寶恩

設計︰梁政敏