舞台劇場場撻生魚 王宗堯自嘲無忽好肉

王宗堯和歐錦棠主演的六場舞台劇《科學怪人：誰主創造》叫好叫座，前日在上環舉行尾場後，眾人即拉隊慶功。劇中王宗堯飾演天才科學家，跟扮演科學怪人的阿棠有多場打鬥戲，為配合頹廢角色，宗堯刻意自閉兼減肥15磅，但見反應熱烈，辛苦總算值得。

王宗堯為今次舞台劇演出，短時間內極速瘦身15磅，身邊不少朋友都笑他瘦到剩番棚骨，偏偏在劇中被力大如牛的阿棠又推、又打，有一幕更被掟出幾呎外，令人睇見都肉痛。

上台有滿足感

宗堯表示排練至演出兩個月內已經全身瘀傷，他苦笑謂︰「全身無忽好肉，最甘一次係仆咗一下，唔小心撼親額頭腫咗。我係瘦咗好多，拍《導火新聞線》電影版時係增肥有肚腩，呢次有個藉口畀自己瘦，仲要減到成個人扁晒，踢波都無力。」

宗堯覺得演員每隔兩、三年做一齣舞台劇，對自己極有幫助，「棠哥嘅製作唔會非常豪華，我抱住學習心態，一定會有得着。」他表示雖然每日演出完已筋疲力盡，不過上到台卻得到很大滿足感，問到最困難的地方是甚麼？他說︰「準備角色嘅時間最難，事關有好多心力上嘅嘢要準備，包括閉關、減磅、頹廢。」

撰文︰Pauline

編輯︰林梓添

設計︰梁政敏