百達翡麗晚宴好盡興 《晴報》社長麥華章扮財神驚喜現身！

名錶品牌Patek Philippe（百達翡麗，簡稱PP）每年都舉行周年晚宴，邀請各大錶行、代理及傳媒友好齊齊玩番晚，今年的Party上星期舉行，黛安都有出席，仲玩得好盡興！雖然派對7點幾至正式開始，但不少來賓好似黛安咁，一放工就到洲際酒店現場，皆因PP每年都預備各種攤位遊戲同大家暖場，玩完仲有紀念品拎走！不過攤位旅戲只係熱身，晚宴活動仲精采。今年PP共筵開22席宴客，以往大會在食飯期間大搞比賽同表演，今年都唔例外，除咗錶行參與，傳媒機構都玩埋一份。

黛安記得早兩年《經濟日報》兼《晴報》社長麥華章都有上台大展歌喉，但今年只見一班經濟日報集團同事唱賀年歌，起初以為麥社長缺席，殊不知當他們唱完《歡樂年年》、邀請財神爺現身，仔細一看，原來財神爺正是麥社長所飾演，讓人驚喜萬分！他更在同事伴唱《財神到》下捧着大元寶到台下派糖果與柑仔，大家都爭住接福！麥社長之後致辭話，財富唔止係金錢上，亦希望大家關注身體及心靈上的財富，着重健康、珍惜眼前人，說得真是沒錯。

此外金寶錶行的短劇亦教人深刻，陳氏兄弟以生鬼具喜感的演繹手法諷刺時事，讓人目耳一新，而James（陳百靈）的歌喉更是悅耳，繞樑三日。

PP掌舵劉玉麟（Alan）雖無落場表演，但就請headtable的所有錶行老闆與高層上台高歌一曲《朋友》。人家常說同行如敵國，好似鐘錶界個個咁friend真少見，所以他們唱這首歌，真是很切合當晚氣氛呢！