黛安
黛安

傳統紙藝花球 山頂打造許願樹

發佈時間: 2017/01/20

傳統紙藝花球 山頂打造許願樹

過年除咗同親戚拜年,搵個地方影靚相更新profile都好緊要㗎!黛安呢排巡咗唔少商場搵至正打卡地點,梗係要同大家介紹番啦。想做文青,去山頂廣場就啱晒了。今年廣場請到獲獎燈飾藝術家陳梓欣同余嘉儀設計大型「花千樹」許願庭園布置,呢棵樹係用中國傳統紙藝花球組成,仲配埋剪紙圖案拼湊而成嘅花燈,大紅大紫,啱晒大家用嚟許願,到時去廣場一樓中庭邊影靚相邊祈褔夠晒一條龍。同埋庭園更加會有造型時尚前衞嘅雞年裝飾「藝雕」,全手工製作了超過兩個月時間,再連續15小時的現場組裝,簡直係嘔心瀝血嘅藝術作品!

至於東薈城名店倉就請來著名花藝師鄭蘶(Kirk)幫手,將「百花之王」牡丹嚟布置,足足用咗成8,000朵花咁多,夠晒「花天花地花世界」啦!Kirk仲話,今次設計特登配搭紅木枝節,用來凸顯番牡丹嗰種吉祥貴氣,啱晒新年氣氛。

撰文: 黛安 消息特靈八卦公關
欄名: 八卦名利場