黛安
黛安

勤覆網民留言 岑智明好夜瞓 天文台擬開官方fb講天氣

發佈時間: 2016/12/01

勤覆網民留言 岑智明好夜瞓 天文台擬開官方fb講天氣

港人關心天氣變化,尤其打風日子,社交平台上自然就爆出各種「碼頭消息」、「歐日氣象台預測」咁。但天氣預測邊係口講咁容易吖,昨日黛安同天文台台長岑智明食晏講起,佢喺打風期間成日見到謠言滿天飛,惟有密密更新自己私人fb闢謠咁話:「fb得我一個人管理,有時夜晚出咗post,有網民回應,答答下又到深夜12點先瞓,呢排都瞓得差咗。」一人之力始終有限,台長話嚟緊喺明年底想搞番個天文台官方fb專頁,請社交媒體才俊幫手,同巿民講下啲天氣知識。

但天氣千變萬化,怕唔怕預測唔準引來網民「嬲嬲」?台長就話無得驚咁多,仲打定底話一早向開設fb專頁多時嘅警方教路:「警察嗰邊教我,啲人識得睇先會識得嬲,即係我哋接觸到本來無機會聯繫嘅群體,係好事來㗎。」台長仲好風趣咁話,天文台準唔準事實勝於雄辯,如外界一直傳有「李氏力場」阻人打風放假,但今年巿民都有1日颱風假啦。佢反而擔心香港人太耐無見識過風暴嘅威力,一旦真係有超強颱風來襲,會疏於防範。

嗜好收集舊相

鍾意收集舊照片嘅台長又透露,最近喺太平山頂裝咗個天氣觀察鏡頭,話係一張舊相驅使佢咁做:「(之前見過)一張1874年甲戌風災之後影的相,我見個景好靚,望到維港,就諗係邊度嚟㗎呢?實地考察後先知原來係老襯亭對上,舊有氣象旗桿嗰度,於是咪舊年開始整番個新鏡頭喺度囉。」

撰文: 黛安 消息特靈八卦公關
欄名: 八卦名利場