即日報名免費親子體驗 麥當勞學沖咖啡

各位家長留意啦！黛安有親子活動推介畀大家。

話說早兩個月麥當勞喺全港30間分店舉行咗「小小麥職場體驗日」，畀小朋友同家長穿上制服、走入餐廳做實習員工，跟McCafé職員學沖咖啡，並且化身餐廳小經理及推廣員，幫手檢查食材或者喺樓面同客人互動，有得玩又有嘢學，活動一推出，名額好快就爆滿。

嚟緊麥當勞會將於12月17日（星期六），舉行第二輪職場體驗日，今日早上11點開始接受報名。大家可以親身到62間參與計劃嘅餐廳填表報名（詳情見麥當勞facebook專頁），活動費用全免，名額有限，先到先得。提提大家，每位參與活動嘅6至11歲小朋友，必須同一位家長或監護人一同參與㗎。