詹sir教精明驗樓 漏水無有怕

成功買樓上車，但收樓時仍不能鬆懈，要成功打造「安樂窩」就要先識驗樓。本刊主辦的「實戰樓市深度課程系列」最後一講，請來資深驗樓師詹濟南（詹Sir）主講「驗樓精明眼」，由分辨化粧樓、睇新舊樓須知到驗樓方法，為讀者解決困擾多時的漏水問題。

對於分辨化粧樓，詹Sir笑稱，「睇樓時首先唔好睇個單位，去後樓梯睇個Condition（情況）先，因為後樓梯同個單位係同樓齡，如果後樓梯爛到不得了的話，單位應該都係爛到咁上下。」

驗樓篇：莫靠外表 留意窗邊水喉

至於甚麼時間驗漏水最好，詹Sir則指，最好當然是十號風號之後驗最準確，但一年都未必會有一日，所以下雨後驗樓已經非常足夠，要靠睇迹象來驗漏水，例如窗邊有沒有漏風、變形和窗隙之間有沒有氣泡等等。

如果買入舊樓，詹Sir表示主要看窗是否穩定、有否漏水；至於新樓，有甚麼「崩花爛裂」都可以點出，連污糟了位置都可向發展商提出，但舊樓最重要是結構，如有沒有改建等。

有時買二手樓，業主需要買家短時間內下決定，驗樓時間倉卒。資深如詹Sir都耍手擰頭「若要在好短時間驗樓，不如你預筆錢做維修算啦。」但若真是要在短時間內收樓，詹Sir就會選擇看窗邊有沒有漏水和廁所天花有沒有爛。

漏水篇：尋找源頭 可循法律追究

有讀者問，樓上漏水到自己在樓下的單位，但多方投訴仍未解決。詹Sir指要「治本」，可嘗試造Surveying Report（勘查報告）交給律師，若金額不是太大就自行交去小額錢債審裁處。「樓下單位有時都未必是想索償，是想止血多，有時法庭未必要樓下業主幫樓上業主搵到源頭，證明到啲水係樓上漏到落黎，要樓上業主幫手維修。」

而詹Sir亦提供了治標的方法給怕麻煩的業主，「做個接水盤，如果唔知就去燒臘舖看燒豬盤是甚麼形狀，裝個喺天花接啲水駁條皮喉漏走佢，唔使滴滴下咁煩。」

詹Sir經常收到樓下投訴稱樓上浴室滲水，令樓下天花發霉的查詢，他指「最好就叫樓下畀張相你睇下，因為50％發霉都會話係樓上搞到佢咁，就連天花脫落都話係因為樓上漏水，所以要睇清楚。（讀者又問：樓下話是當樓上沖涼時先漏。）一定係咁樣講，好多人唔肯承認係自己問題。既然樓下指洗澡時會漏水，就真係落去睇下係咪濕，落去用紙巾按一按樓下個天花。」

遇漏水勿驚慌 冷靜找出源頭

詹Sir發現驗樓常見的的問題都離不開漏水，不少人發現漏水後會手足無措，詹Sir就提醒業主發現漏水後要先冷靜，切勿驚慌；然後細心留意漏水位置，及其漏水時間是否有規律；之後，留意離漏水位置最近的水喉，慢慢追尋滲水根源。

詹Sir即席傳授一招驗樓秘技給在場讀者，「收新樓時，尤其是夏天，開大廚房和廁所抽氣扇，廳和房間就開大冷氣，製造負氣壓」，目的是自製「倒汗水」，令濕氣在隙縫中走入，若窗框內藏水的話，放紙巾測試，在懷疑漏水位置就會濕。

撰文：鄒潔儀

（原文刊於iMoney）