一田開設 Hello Kitty限定店！

作為Hello Kitty迷嘅黛安，今個聖誕認真高興，繼7-Eleven日前宣布，今個星期三（7/12）起換購Sanrio x LINE嘅靚靚水杯，噚日黛安從一田百貨CEO黃思麗（Susanna）口中得悉，四間一田分店（沙田、大埔、荃灣及旺角店），即日至明年1月2日，會開設「Hello Kitty In The Wonderland」期間限定店，獨家限量發售逾150款Hello Kitty夢遊仙境系列精品及服飾，包括首次發行嘅人氣Tote Bag、化粧袋、衞衣、冷帽、文具精品等，真係想一次過掃晒佢哋返屋企！

今次係Hello Kitty首次與香港百貨公司聯乘合作，以全新的主題圖案設計一系列獨家精品。身為店長嘅Kitty亦有現身同粉絲玩遊戲；靚女藝人朱千雪仲親手整咗啲泡芙送畀Kitty𠻹！Susanna亦宣布明年喺西環開一田，並打造為全球首間Hello Kitty期間限定超市，黛安真係好期待呀！

上環有免費畫展

黛安仲知道，上環高陞畫廊明日起會舉行免費入場嘅「KAWAII展覽」，攞咗Hello Kitty設計師山口裕子2009年為Hello Kitty 35歲生日創作嘅4幅作品來港，每幅全球限量50張，超級珍貴。畫廊亦會展出以「花花」為代表作的村上隆作品，部分用咗浮世繪畫風，玩味十足又可愛。