【聲明】港生活網站並無進行電話推廣活動

提交集體回憶相 新舊對照 海洋公園送4000門票

發佈時間: 2016/12/06

人生有幾多個40年?海洋公園陪伴香港人成長,原來公園明年就開業40周年,第一波慶祝活動係舉辦攝影比賽,鼓勵市民提交新、舊照片,重拾集體回憶。

相信大家最想知有咩禮物!海洋公園話已經預備咗4,000張入場券送畀市民;相片獲得最多人Like嘅優勝者,仲可獲10年有效嘅全年入場證優越卡4張!禮物咁吸引,黛安返屋企都要搵下有咩舊相適合參賽先得!

公關姊妹提到有咁嘅意念,緣於有60多歲員工分享水族館開園前期嘅照片;亦有員工share當年帶細路入場嘅精彩時刻,家陣細路都長大成人,見到大家對回憶咁回味,咪啟發園方搞今次活動囉!

大獎10年免費入場

如果你都想免費入海洋公園玩,由明日(7/12)起至今個月29日,只要遞交一張2011年或之前在園內拍攝嘅舊相,連同今年園內拍攝嘅近照,附上200字簡短說明,只要相中人物同數目相符,便合乎資格參賽。4,000張門票會以先到先得方式送給合資格參加者,得票數量視乎相中人物總數,門票明年全年有效。大家可將作品上載到https://40a.oceanpark.com.hk,相片明日起至31日接受公眾投票,最高得票者更可獲10年有效的全年入場證優越卡4張!結果將於明年1月10日公布。

撰文: 黛安 消息特靈八卦公關
欄名: 八卦名利場