屯門區稱得上是「地大物博」，乘輕鐵到不同車站，小區光景截然不同。想認識屯門「物博」的一面，不妨由味覺先行，先帶大家在何福堂站附近尋找懷舊冰室，然後往新墟站，試試日本人炮製的正宗沾麵，之後到下一站景峰，歎清新素薄餅，尋找屯門的真滋味。
1. $20薑煲檸檬可樂「萬芳冰室」
「萬芳冰室」前身是屯門蔡意橋的一間士多，由老闆之一榮哥的婆婆經營。結業後十多年，有天榮哥與表哥閒聊時，共同構思經營餐廳，讓一家人有地方相聚，因此憶起婆婆的士多，便決定讓「萬芳」名字再現。
冰室背後理念為「重拾舊日的真、情、味」，老闆榮哥說︰「我哋一班股東都希望客人嚟到，可以食到食物的『真味』，更加希望佢哋從食物的味道之中，憶起昔日嘅情懷。所以每一款菜式，我都會多番嘗試、改良，務求搵番『當年』味道。」推介之一的「生炸無敵大雞髀套餐」，未見真身前，還以為只是噱頭效果，但甫上桌，簡直嚇親人，雞髀Size如同筆者的手掌般大，令我忍不住「嘩」一聲。雞髀品質有信心保證，皆因股東從事食品供應，每日新鮮來貨，以獨門秘方醃製，即叫即炸，油溫亦調校過，由專人看實，一定不會過火喉，雞髀Juicy啖啖肉，好食到停不了口。
食物質素高，飲品亦值得一試，這裏供應的傳統「薑煲檸檬可樂」，不會像坊間做法，放進微波爐加熱便算，而是用煲煲滾，再加上大量薑絲及一片檸檬，原來這是榮哥婆婆的秘方，冬天時飲用，更有助驅寒。
冰室有得食有得飲，還有得影，皆因店內裝修走懷舊路綫，牆上的電影海報更請老師傅手畫，仔細看，其粗糙的筆觸有種說不出的懷舊美感。假日時，不少年輕人會到來Selfie「呃Like」呢！
萬芳冰室
地址：屯門新墟屯門鄉事會路112-140號雅都花園商場1樓
電話：2404 8168
營業時間：星期一至日，7:15am-9:30pm
備註：另有元朗建德街分店（電話：2870 2777）
2. $80黑油豚骨沾麵「赤橋拉麵」
為食筆者向來是日本沾麵小粉絲，早已有屯門友介紹區內的「赤橋拉麵」，難得來到，當然要一試。小店的寺田師傅，未開店前受朋友邀請到深水埗沾麵店工作，筆者當時就是迷上那麵店的味道。今次前來訪問，才知道當年的麵店原來搬到屯門，即有種說不出來的感觸。
這間拉麵小店由寺田師傅與港人老闆娘Phoebe合作開設，二人在舊公司相識，當時Phoebe熱愛日本文化。為了練習日文，不惜在日本拉麵店做兼職繙譯，後來嘗試創業，寺田師傅很認同其意念，便促成合作。另一方面，Phoebe自小在屯門居住，清楚附近沒有相類似的食店，最後落戶紅橋，命名為「赤橋拉麵」。Phoebe說：「紅橋其實算偏遠，但勝在食店集中，識食人士一定識得嚟呢度。附近街坊好有人情味，有陣時寺田師傅出去行一陣，都會收到禮物，令離鄉工作的寺田師傅感到溫暖，所以師傳都好鍾意呢個區。」
小店只售四款拉麵，可選沾麵與湯麵，Phoebe說：「我哋選擇唔多，但貴精不貴多，做好呢幾款就有品質保證。湯底、餸菜、配料都由師傅一手包辦，味道才夠一致。」筆者特別推介「黑油豚骨沾麵」，黑油由寺田師傅親自將黑蒜炸成油再加工，減低油膩，豚骨湯底更煲足十小時，麵底有小麥粒，增加口感，沾上湯底時，兩者配合得接近完美。
赤橋拉麵
地址：屯門青菱徑9號華利大廈地下5號舖
電話：3686 1221
營業時間：星期一至日，12nn-3:45pm、6pm-10pm
3. $38精選套餐「常嚐素」
「常嚐素」由趙氏三兄弟經營，三人早年跟隨母親茹素，加上熱愛動物，漸漸由茹素者，轉為推廣素食的夢想家，更希望以新穎手法，令大家更易接受素食主義。
趙先生說：「其實以前我哋係開肉食Pizza店，後嚟我哋三兄弟希望推廣素食，做生不如做熟，於是將素食混合Pizza，而『常嚐素』的意思就係叫大家多試素食。年輕人比較容易接受，而且鄰近亦無相類似餐廳，所以就決定一試啦！」
小店同樣鄰近紅橋，開業近四年，以街坊生意為主，價錢亦頗抵吃，但趙先生表示，經營其實相當吃力，因為蔬菜來貨比肉類更貴，成本不斷上漲，但為了理想，多辛苦也願堅持下去。這裏除會提供全素，亦會有蛋、奶等食材，客人點餐前，店員會提醒當中成分。你可能會問，Pizza無芝士點會好味呀？採訪當日，筆者試食意式番茄比薩，就是用了「米芝士」炮製。粒粒芝士融進薄餅，口感脆身，清新的番茄混合粒粒芝士，咀嚼時更加過癮，加上入口香濃又美味，質素不會比一般芝士差。而且「米芝士」本身帶有微甜，可中和番茄的酸味，提升整個薄餅的滋味。小店抵食之選，必定是「精選套餐」，38元套餐有自家煲的足料素羅宋湯、一塊素薄餅及西式意粉。
常嚐素
地址：屯門井財街青棉徑5號金寶大廈地下7D號舖
電話：3488 0072
營業時間：星期一至日，11am-10:30pm
撰文：唐蔚霖
攝影：林良明
插畫：Human Ip
編輯：余運慶
設計︰大雄