黛安
黛安

影帝出馬 劉青雲跑入鄉郊 介紹香港自然地標

發佈時間: 2016/12/07

影帝出馬 劉青雲跑入鄉郊 介紹香港自然地標

影帝劉青雲黑黑實實,形象一直都好健康,黛安知道佢最近免費幫旅發局拍宣傳片,由城市跑入鄉郊,介紹香港自然美景同文化遺迹。為咗跑姿更「pro」,青雲更特意請教練「執正」跑步姿勢,非常專業!

青雲話經常覺得要同時間競賽,好在得閒可走開放鬆一下,事關寧靜嘅大自然就在身邊,更可感受到濃厚嘅人情味。片段入面,佢途經多個重要景點,如皇后像廣場、山頂白加道等,鏡頭一轉更由燈火璀璨嘅市區跑入郊外,走入大澳漁村等食好味又地道嘅豆腐花,最後企喺飛鵝山一塊大石上俯瞰對岸景致,畫面唯美又有氣勢!據聞青雲家住西貢,本身好鐘意行山,整條影片拍攝需時3日,飛鵝山大石一幕,原來係青雲主動同導演商討拍攝,足證佢拍攝幾咁認真。

除咗青雲外,旅發局分別邀請了飲食名人如蔡瀾、歌手陳奕迅、影星王敏德同太太名模馬詩慧拍攝宣傳片,在東南亞、台灣、內地等電視頻道播放,本地觀眾想睇就要上facebook或youtube啦。

撰文: 黛安 消息特靈八卦公關
欄名: 八卦名利場