黛安
黛安

港餐廳80後創辦人 奪亞洲最佳女廚師

發佈時間: 2016/12/14

港餐廳80後創辦人 奪亞洲最佳女廚師

香港人識飲識食,講到美食邊逃得過港人法眼。最近黛安聽到香港餐廳Little Bao勁威威,佢哋嘅32歲型女創辦人兼主廚May Chow喺「亞洲50最佳餐廳」中贏咗2017年度亞洲最佳女廚師獎,出年2月就會飛過去曼谷攞獎。

黛安噚日化身小記者,打去問阿May有乜得獎感受。佢話:「一開始非常驚喜,但之後就覺得有壓力,因為攞獎意味要開始為餐飲界貢獻更多,要盡力同勇於做其他女廚師嘅榜樣﹗咁多年一直只係為自己努力,依家需要幫其他亞洲女廚師或香港本土廚師鋪路,等大家相信有實力實有人賞識﹗」

公關姐妹都大讚May好叻女,加拿大出世嘅佢細個經常喺美國同香港兩邊飛,並喺波士頓大學酒店管理系畢業,08年返港,喺「廚魔」梁經倫嘅Bo Innovation及Yardbird呢啲名店學廚,由低做起,到2013年終於喺蘇豪區創辦Little Bao,今年喺曼谷開分店,亦喺香港開咗主打中式風格嘅美食酒吧gastropub,勁sell香港街頭美食,好有創意。

創意漢堡包 好食好玩

May最叻係煮中菜,唔止講究味道,仲要好玩﹗好似佢將中式蒸包整到漢堡包咁,餐廳裝修走美國街頭風,啱晒香港華洋雜處嘅特色,又切合May讀番書大嘅經歷,真係perfect match。

撰文: 黛安 消息特靈八卦公關
欄名: 八卦名利場