330名「晴報員」鴻星聚餐 提早做冬 抽獎玩遊戲

相信唔少《晴報》讀者，每朝都會見到「晴報員」同大家講「早晨」，並將《晴報》嘅精采內容派送到大家手中，呢班默默耕耘嘅晴報員，係報社重要嘅好同事，勞苦功高，所以每到年尾《晴報》都會請大家食餐飯，齊齊開心番晚！

一年一度嘅晚宴上星期五喺觀塘鴻星舉行，一眾晴報員都着得靚靚去食飯，好似開Party咁開心！咁熱鬧嘅場合點少得黛安？聽《晴報》marketing姊妹講，當晚有成330位晴報員參與。管理層亦同晴報員打成一片玩遊戲，出題考大家《晴報》嘅小知識，仲競猜經典廣告同電視劇對白、玩加速版「估歌仔」，大家鬥快打電話搶答，真係開心又盡興。

全晚高潮莫過於抽獎環節，獎品好豐富，唔止有橙汁機、空氣清新機等實用家電，仲有人氣手機同旅遊禮券等，難怪抽獎時全場歡呼聲四起！當晚更特別嘉許20位優秀晴報員，表揚佢哋敬業樂業嘅精神𠻹！

抽唔到獎唔緊要，因為每人都有一份窩心禮物包，入面有盞記贊助嘅冬菇、臘腸、西梅，永南食品贊助嘅公仔麵，雀巢三花贊助嘅雙效降醇素營養奶粉，京都念慈菴贊助嘅枇杷潤喉糖，以及《經濟日報》副社長兼研究部主管「石sir」石鏡泉親手種嘅白磨菇。人人都可以滿載而歸！