【聲明】港生活網站並無進行電話推廣活動

蘇錦樑入迪士尼頒獎 率先去玩Iron Man飛行車

發佈時間: 2016/12/20

迪士尼的鐵甲奇俠(Iron Man)主題遊樂設施下月開幕,商務及經濟發展局局長蘇錦樑昨出席迪士尼「幻想工程香港挑戰賽2016」頒獎禮,除咗去即將擴建的睡公主城堡前與參賽者留影,亦去咗玩「鐵甲奇俠飛行之旅」,呢個4D影院除咗有立體效果外,仲會大幅搖動,難怪局長都話好玩刺激!

公關姊妹介紹,玩家坐上「飛行車」,戴上3D眼鏡後便可與Iron Man一齊飛去旺角、銅鑼灣鬧市等。雖然「飛行車」唔係過山車,但搖動時最高點可相距10呎,更加入風吹等特效,細膽啲都唔得。之後局長去咗「鐵甲奇俠裝備展」同Iron Man影相,聽幻想工程師講解點樣將高科技呈現到現實園區。

講番挑戰賽,今年係第6年舉行,參賽者要將幻想引入自己校園的公共空間,其中城大憑「Monster City University(Draboland)」勇奪冠軍,佢哋作品加入中國元素,以古代樂器裝置做主體,可吸收陽光,晚上可發光,供遊人留言或繪圖,難怪局長聽學生介紹時,顯得津津有味!

撰文: 黛安 消息特靈八卦公關
欄名: 八卦名利場