旅遊界「大家姐」劉美詩 回巢康泰

旅遊界「大家姐」劉美詩（Susanna）最近又有新動向喇，噚日黛安同佢食Tea，原來佢今年10月已經「回巢」返咗康泰旅行社幫手。「Su姐」透露，今年暑假大、細黃生（康泰董事長黃士心及兒子黃進達）誠邀佢返康泰幫手，「自己好鍾意旅遊，之前無做旅遊界時，都好關心相關新聞，個心始終放唔低。」於是佢考慮咗短短個幾星期就答應對方。

「Su姐」喺2010年離開任職32年的康泰，去過城大教書，翌年加入專業旅運推廣個人遊，直到舊年年初毅然轉行，到胞姐創立的僱傭公司幫手。「Su姐」笑言，返到康泰的大家庭，感覺好親切，當前的首要任務係優化公司個App，增加報名、職員提供意見等服務，未來主力搞旅行團，仲承諾「諗多啲Gimmick（特色）團畀大家參加。」鍾意旅遊就要留意住康泰未來有乜新搞作啦！