出爐帝后唔肯錫錫 展鵬：呢排咀得定欣太多

出爐視帝、視后陳展鵬與胡定欣，終於一圓「大滿貫」目標，早前二人誇下海口稱倘若贏到香港視帝視后就會公開咀嘴，不過二人奪獎後返入後台時卻不肯「找數」。

展鵬和定欣憑《城寨英雄》膺視帝、視后，兩人前晚現身後台，傳媒隨即起哄要他們「找數」，展鵬三催四請下才作狀吻定欣，而定欣則以手指送飛吻落展鵬塊面，當然無人收貨，展鵬無奈笑言：「玩咁大收唔到科喎！」最終展鵬錫定欣面珠幾秒，定欣非常受落。

展鵬被指吻定欣時扭扭捏捏，他笑謂：「呢排拍戲咀定欣咀得太多，加上自己有感冒，費時傳染畀佢。（《同盟》要激吻？）有啲有深度、有感覺嘅吻。」《城寨英雄》在頒獎禮上橫掃六個大獎，展鵬坦言沒有想過劇集成績這麼好，始終星、馬兩地和香港觀眾的口味可能不一樣，他笑謂：「今晚應該瞓唔着，會攬住個獎瞓。」

唔公布戀情怕失機會

對於能冧莊視后，定欣表示早就有信心，事關經過新加坡及馬來西亞兩個頒獎禮，希望返港仍得到支持，她明白「大滿貫」真的好難得，定欣坦言現在想拎最受歡迎電視女角色和光輝演藝人大獎。

既已同奪大滿貫，是時候宣布戀情？他們對望後，展鵬笑稱多謝傳媒一直以來對他們的炒作，定欣表示：「係對我哋嘅支持！」他們說沒有事要公布，但希望日後繼續有合作機會。展鵬又謂暫不談感情事，免得浪費工作機會。

採訪：Pauline

攝影：林良明、Lego

編輯：林梓添

設計：梁政敏