聖誕老人芬蘭訪港 向捷旅VIP派禮物

早前捷旅集團（Jetour）主席Ronnie（何栢霆）邀請黛安去半島酒店，參加今年第一個聖誕Party，最開心大會請咗來自芬蘭嘅聖誕老人光臨！可惜佢嘅馴鹿行唔開，所以改搭芬蘭航空赴港，酒店仲派咗架勞斯來斯去機場接佢𠻹！

查實Ronnie之所以請到聖誕老人訪港，皆因Jetour最近同VisitFinland合作。當日佢仲請咗幾十位Jetour嘅VIP齊齊開Party。12月嘅半島，大堂架起巨型聖誕樹，洋溢濃濃嘅聖誕氣氛。當日半島及Jetour管理層、芬蘭駐港總領事等一齊主持聖誕樹亮燈儀式，當然唔少得向聖誕老人打卡影相啦！

儀式過後黛安跟住大家坐專用電梯上半島酒店舊大樓嘅頂層，再行樓梯上天台嘅Garden Suite，原來呢度昔日係總統套房，現時則成為舉行私人活動場所，唔怪得有專用電梯咁巴閉啦！食過聖誕大餐後就係聖誕老人派禮物嘅時間，禮物包內有張佢親筆簽名嘅聖誕卡，呼籲大家寫上鼓勵字句，交由「願望成真基金」送畀患病嘅小朋友，鼓勵佢哋努力追夢。原來半島已連續十多年支持願望成真基金，早前更為患病小朋友搞聖誕Party，今年Jetour仲幫手安排聖誕老人出席聚會，趁佳節為佢哋送上祝福，真係好有意義呢。