黛安
黛安

樂團中環報佳音 誠哥聽出耳油 拍手稱讚

發佈時間: 2016/12/22

樂團中環報佳音 誠哥聽出耳油 拍手稱讚

假期臨近,全城充滿聖誕氣氛,報佳音歌聲處處,噚日經過長江中心見到好多人,原來係有合唱團報佳音。黛安都停低喺度聽咗一陣,竟然發現長和系主席李嘉誠都喺現場駐足觀看,仲聽得好開心拍晒手掌。

個合唱團有成60人,唱到「You raise me up, so I can stand on mountains. You raise me up, to walk on stormy seas......」,超人聽到「You raise me up」時,仲寄語話「無論山多高,海多深,堅抱信念,終可超越界限」,兼且祝願大家聖誕快樂,平安愉悅!

見到誠哥就一定會諗起佢眼光極準嘅維港投資,聽啲關注start-up嘅朋友講起,維港投資又有新項目,係一間設計科技設備嘅公司「Superflex」。

黛安睇過啲資料,Superflex嘅設計,就咁睇有啲似件衫咁,但其實係專門設計畀長者、運動員同傷殘人士使用,入面安裝咗好多智能「肌肉」支持人體活動,令着咗件衫嘅人運動自如,真係成件「超級戰衣」咁!

$7500萬 研「超級戰衣」

今次維港投資同其他幾間公司一齊投資咗960萬美金,即係大概7,500萬港元,Superflex創辦人兼行政總裁Rich Mahoney話,希望設計出好睇又着得舒服嘅「戰衣」,等傷殘人士可以有多啲自信,長者可以有多啲活動,亦幫助減少工作場所嘅受傷機會。

撰文: 黛安 消息特靈八卦公關
欄名: 八卦名利場