正式「升呢」王老闆 祖藍唔敢簽老婆死黨

曾志偉和王祖藍成立的「手工藝創作有限公司」昨日在中環四季酒店舉行冬至聚會，旗下藝人包括祖藍太太李亞男、徐子珊、鄧萃雯、細細粒及阮兆祥等空群出動，加上邵氏兄弟執董樂易玲亦現身撑場，聲勢浩大。

昨日姍姍來遲的志偉，直言公司名字如同手作仔不會做到好大，但可以穿針引綫。至於另一董事祖藍則在台上稱呼雯女是萃雯姐，她聞言即搞鬼地說：「你…老闆呀！係咪要咁稱呼你吖！」祖藍回應：「簽我哋公司之後變粗魯咗。」

雯女於日前台慶頒獎禮大騷事業綫成功搶Fo，她笑言：「冇見大家咁耐，大家以為我冇晒事業心！」問她簽了祖藍公司多久，她說：「其實三月已經開始合作，至於是否幫TVB拍劇則要睇劇本。（是否要祥仔做拍檔？）好對手當然輕鬆好多，不過我最想拍有關社會議題的劇集，講下小學生、幼稚園家長，想拍些有意思嘅戲！（叫祖藍寫劇本？）我都有同佢傾，近年休養生息，踏入50歲和以前不同，希望回饋社會。」

雯女接劇自己話事

升呢做老闆的祖藍與太太兼員工李亞男齊齊受訪，他戲言各界一路也不知自己做甚麼，「我簽嘅人希望全面少少，歌手、主持、模特兒都有，來自香港及北京。」提到可會簽亞男「處女黨」的姊妹，祖藍笑道：「佢所有姊妹和TVB都友好關係，等佢哋結晒婚先。（雯女話想拍社會議題劇集？）雯女想拍乜就拍乜，我哋有劇本工作室，曾創作內地劇集《蜀山》系列、《老表》等等！」

採訪：Steven

攝影：林良明

編輯：林梓添

設計：梁政敏