新婚即返港 香香強強機場狂曬恩愛

今個月18號在加拿大溫哥華與拍拖一年多的強強（Joshua）結婚的岑麗香（香香），昨早和老公十指緊扣返香港，兩人一直表現得甜到漏，愛妻深切的強強為了遷就香香繼續幕前工作，更計劃長居香港。

昨早約八時，新婚香香和強強手拖手出閘，香香手上還戴住由強強設計的鑽戒。兩人出閘一刻，大批傳媒上前追訪，場面一度混亂，期間更撞倒旅客行李，高大的強強飛身上前扶番正行李，香香亦二話不說幫手，夫婦十分合拍。

老公或留港定居

受訪期間，香香不時望着老公甜笑。問到幾日後就是兩人婚後第一個除夕夜，香香表示早前已接了一個澳門job，屆時強強也會陪她。至於何時造人？香香笑謂：「未咁快，計劃返嚟做嘢先。」

強強也帶笑表示：「諗下先，未有咁快手。」問香香今次留港多久？她說：「耐㗎，都要準備二月開劇，希望開工前去旅行，二人世界先。」問到強強會逗留多久？他說：「幾個月。（嚟香港做嘢？）未諗到咁遠。（係咪停工來港陪老婆？）呢度都可以開工嘅（會否喺香港定居？）會諗住喺度呀。」

之前在溫哥華擺酒的香香，正考慮在港補請沒有去當地的親友食飯。香香更說一定會請好友王君馨，「見佢攞獎好感動，佢戥我哋開心，我哋都戥佢開心，互相恭喜所以一定要一齊食飯。」

撰文：Pauline

編輯：林梓添

設計：李明