【聲明】港生活網站並無進行電話推廣活動

海洋公園優惠老友記 大派餐飲券 食品買1送1

發佈時間: 2017/01/24

自港鐵南港島綫去年底通車,每日有超過10萬人次使用,除咗上班族,唔講唔知,原來吸引到一班「老友記」出動四圍玩。黛安噚日同海洋公園CEO李繩宗(Matthias)飯聚傾開,佢大爆港鐵開通後,65歲或以上長者嘅入場人次,比舊年同期急升70%,令佢好驚喜,事關長者享有2蚊搭車優惠之餘,入海洋公園都係免費,所以咪咁多人支持囉!

40蚊門票 年輕人捧場

Matthias話咁高興嘅事,當然唔可以畀佢停啦,所以海洋公園將由大年初一(28日)至2月28日推出長者尊享優惠,入場後可獲贈餐飲優惠券,除咗光顧園內餐廳享有8折,喺「香港老大街」內買所有食品都係買一送一!公園仲好貼心咁,為長者設計健康餐單,主打蔬菜、燕麥、生果,希望老友記玩完仲可食得健康。

講開優惠,海洋公園今年慶祝40周年,本月11日曾喺網上推出2.8萬張40蚊優惠門票,但Matthias話推出10分鐘就發現有黑客「打尖」購票,所以為公平起見,立即截龍再加推2萬張門票,改喺上星期一(16日)起,喺公園現場發售。

海洋公園營業及市務執行總監李玲鳳(Vivian)仲靜雞雞講畀黛安知,佢留意到以40蚊門票入場嘅多數係後生仔女,每朝7至8點係入場高峰期,9點至中午前就會售罄,「佢哋入場鍾意食吉列豬肉洋蔥串配炸薯條連汽水㗎!」咁多優惠,聽到黛安都蠢蠢欲動,一於趁今個星期五(27日)40蚊優惠門票活動結束前,帶埋家中「老友記」一齊去又玩又食先!

撰文: 黛安 消息特靈八卦公關
欄名: 八卦名利場