【聲明】港生活網站並無進行電話推廣活動

鋒味曲奇放全盒 皇室蘭花綴家居 商場年宵辦新潮年貨

發佈時間: 2017/01/16

倒數唔夠兩星期就踏入丁酉雞年,大家辦咗年貨未呢?最近天氣咁凍,如果有室內年宵市集可以辦年貨你話幾好!黛安知道有商場打正旗號以室內年宵迎雞年。

MOKO新世紀廣場就喺港鐵樓層中庭舉行「豐衣足食迎豐年」室內年宵市場,賀年美食攤位貨品應有盡有,除咗有傳統年貨海味同鮑魚,亦都有新潮年貨,包括藝人謝霆鋒主理嘅鋒味曲奇,仲有創意手工糖果Hey Candy,放喺全盒入面就最啱!

而東港城亦舉行第十一屆新春花展會,場內出售各類乾濕年貨,例如傳統糕點、海味、當造水果及食品禮品。商場亦同香港蘭花大王楊小龍同香港年花大王賴榮春合作,推出15款矚目特色年花,包括仍然以7年前舊價發售嘅蝴蝶蘭,買咗記得放喺通風位置,令蘭花更加耐看。現場仲有矜貴皇室系列蘭花,索價過萬蚊亦不乏捧場客!

摩天輪下逛市集

另外今年中環摩天輪仲有個破舊立新嘅年宵市場,有超過80個攤檔俾大家玩、食、逛過夠,有多間星級餐廳、各國及本地特色美食、本地藝術品等參展商參加,一個年宵集齊玩食買所有元素,到時一定要去行下先得!

撰文: 黛安 消息特靈八卦公關
欄名: 八卦名利場