【聲明】港生活網站並無進行電話推廣活動

紅十字會填色賽 學習人道精神

發佈時間: 2017/01/16

良好嘅品格要由細個開始培養,香港紅十字會嘅「小紅星獎勵計劃」噚日舉行,希望以遊戲方式畀小朋友學習人道精神,小紅星大使森美都有到場,佢話「人道」呢兩個字聽落好深奧,但係日常生活上都可以體驗到,最重要係家長喺子女成長階段中,為小朋友解釋兼且要身體力行。

紅十字會噚日頒發「人道小英雄填色大賽」嘅獎項,以填色同繪畫傳達「無私及關懷」,黛安去咗睇下小朋友嘅作品,全部都色彩繽紛,畫功仲好好!高級組冠軍王濼羲嘅畫作就唔止得一個情境,濼羲話生活上有好多樂於助人嘅情況,所以希望可以喺畫入面畫晒出嚟。評審之一嘅客席插畫師徐羨曾好欣賞小朋友嘅創意,仲講笑話評審2千幾幅作品都幾傷腦筋,畫作除咗靚,表達出對主題了解同創意都係加分位,咁睇嚟得獎小朋友嘅作品真係好高水平喇!

撰文: 黛安 消息特靈八卦公關
欄名: 八卦名利場