親子赤腳行4公里 為南蘇丹難民籌款

雖然已踏入21世紀，但世界仲不時有戰火塗炭生靈，就不得不認同香港係個福地，所以幸福嘅香港人，不如趁新年做下善事，幫下其他有需要嘅人。

南蘇丹係全球最年輕嘅國家，但黛安知道，自2013年起持續受到戰火摧殘，導致100萬人逃離去鄰近國家，160萬人喺境內流徙，當中更有超過一半係小朋友。為咗畀港人親身感受吓貧窮孩子嘅苦況，香港世界宣明會將喺下月4日（農曆正月初八）舉行第10屆「新春『童』樂赤腳行」活動，邀請善心人喺清水灣鄉村俱樂部入面，赤腳步行約4公里，以實質行動為南蘇丹孩子同佢哋嘅家庭籌款。籌得嘅善款，會用喺支持宣明會於南蘇丹推行嘅營養及衛生項目，為有需要家庭提供適切援助，黛安都諗住同姨甥們一同報名參加。

參加活動嘅家庭仲可以選擇參加親子工作坊，用簡單嘅材料，嘗試建造臨時帳篷、洗手間等難民營不可或缺嘅設施，走出課本，加深對難民營生活嘅了解。詳情可瀏覽www.worldvision.org.hk/cwalk。