置地年宵sell本土 掃貨必行！

農曆新年將至，大家都趁佳節與家人共叙天倫食團年飯。黛安就最鍾意食阿媽炮製嘅臘味飯同花膠湯，每一啖都好溫馨！最近行經Landmark（置地廣場）發現，原來即日至本周五（27日），商場中庭舉行賀年手工藝盛會，好多個本地傳統品牌擺攤位，例如半世紀專營花膠的「同昌」、大澳新鮮自家製蝦醬「益昌號」等，仲有手工藝攤位等大家欣賞傳統繡花鞋同瓷器，大賣本土產品。

今次盛會有50年代起經營家庭式臘腸生意嘅「錦祥號」，佢哋至今由選料、調味至曬乾都係以人手製作；仲有半世紀製作高質麵食嘅「張榮記」，特別係鮑魚麵和瑤柱麵，每一麵條都煙韌彈牙。飯後當然要飲杯靚茶消滯解渴，半世紀專營優質茶葉嘅「工夫茶舍」則呈獻傳統沖泡手藝同茶品。鍾意手工藝品嘅，除咗可欣賞到「先達商店」嘅三代傳承繡花鞋，仲可參加工作坊，其中最古老嘅手繪瓷器廠「粵東磁廠」會分享繪製陶瓷心得。而米芝蓮廚師、唐人館行政總廚歐國強仲會當場炮製花膠菜式，黛安都要帶屋企人來逛逛！