天際100「離地」過年 利東街睇國際巡遊

仲有幾日就到新正頭，有4日假期，黛安已好勤力咁plan緊去邊玩！早幾日去ICC 101樓食晏，發現原來天際100香港觀景台搞緊「迎高接福在天際」活動，擺放咗多個金雞賀歲布置，例如有個畀訪客投入如意金蛋祈福嘅互動遊戲裝置「金蛋去哪兒」；觀景台西面嘅「天際桃花大道」就更受年輕人歡迎，矗立咗多棵2.5米高嘅大桃花，唔知行完之後會唔會特別有桃花運？

元宵搞婚禮市集

最吸引黛安嘅當然係美食，今年天際100同人氣雞蛋仔店摩豆Modos合推3款雞蛋仔，其中一款係為天際100度身訂造、以藍天白雲為創作藍本嘅「天際雞蛋仔」，喺393米高空「離地」歎香港特色街頭小食，得年初一至七（1月28日至2月3日）有得試！

除咗上半空，地面上都有唔少好吸引嘅賀年活動，例如灣仔利東街就已化身做花燈古街，千幾個大紅色燈籠掛滿成條林蔭步行街，充滿傳統嘅喜慶氣息！到年初二（1月29日），利東街仲會上演新春節慶巡遊，包括來自西班牙嘅幻彩華麗舞蹈團，來自俄羅斯嘅糖果大師同德國高蹺藝術團。

過年後好快又到情人節，利東街添置咗一張情人雙座椅，戀人可以將寫有雙方姓名嘅同心鎖，緊緊扣喺公共座椅上，唔使去歐洲都可以享受浪漫一刻。元宵節及翌日（2月11及12日），利東街仲會舉辦一個以婚禮為主題嘅元宵市集，仲會上演中式裙褂時裝表演。