九巴落區派年糕 氹「老友記」開心

新年其中一個例牌活動就梗係食糕！九巴義工早幾日落區派年糕畀「老友記」，希望佢哋過個肥年！

公關姊妹同黛安講，因為舊年盈利表現不俗，又見就近新年，九巴高層同職員，仲有「九巴之友」義工隊就齊齊喺港九新界首辦贈送活動，向長者贈送過萬份年糕同利市封，希望深入社區，關心長者咁話！原來今次已經唔係佢哋第一次做呢類關懷社區嘅活動，佢哋仲曾經喺中秋節派過月餅。

九巴管理層話，見到老友記拎到賀年禮品嘅開心樣，一眾同事同義工都感到好欣慰。不過，畢竟年糕數量有限，先到先得，高層話估唔到市民反應咁熱烈，萬幾個年糕根本唔夠派，年糕喺半小時內，甚至15分鐘就已經派晒！期望未來若有同類活動，會安排得更好！