【聲明】港生活網站並無進行電話推廣活動

海洋公園Paul哥 最懂熊貓心 難忘教安安佳佳閉氣做體檢

發佈時間: 2017/02/03

同動物玩真係好開心,之前海洋公園嘅姊妹介紹佢同事吳乃江(Paul哥)畀黛安識,佢title好特別兼好長,係「動物行為及環境豐容項目經理」,Paul哥話「環境豐容」即係用道具、食物、氣味等,設計啲項目俾動物參與,例如用有氣味嘅毛巾吸引動物周圍走,增加運動量,令動物喺有限空間保持身心健康。

設計玩具 增運動量

Paul哥最有經驗係照顧大熊貓,過咗身嘅全球最長壽圈養大熊貓佳佳,同埋安安、盈盈、樂樂,都有唔少「玩具」由Paul哥設計,例如佳佳最鍾意嘅貓形波波,Paul哥會喺入面裝食物,等佳佳動腦筋拎出嚟食,佢亦好鍾意玩麻包袋同檸檬味毛巾。

豐容項目唔止可提高動物福祉,仲可建立人同動物關係,對醫療都有幫助,如當年獸醫幫安安、佳佳做body check係用人類用嘅X-ray,需閉氣先照到。但要教大熊貓閉氣,真係令人類好閉翳,Paul哥用手擋住安安、佳佳一邊鼻哥窿,佢哋就會唔唞氣,Paul哥就吹哨同獎勵佢哋,經過60日訓練,安安、佳佳一聽到哨聲就識閉氣3秒,順利照到X-ray。Paul哥又用類似嘅方式令熊貓嘗試進食西芹、西梅汁甚至維他奶等食物!

Paul哥喺海洋公園做咗39年,佢話學到尊重生命,又畀tips有志入行嘅後生仔,最重要有耐性、肯學習,笑言「無蠢嘅動物,只有蠢trainer」咁話。

撰文: 黛安 消息特靈八卦公關
欄名: 八卦名利場