「第36屆香港電影金像獎」昨日舉行記者會，公布19項入圍名單，頒獎禮將於4月9日假香港文化中心舉行。《七月與安生》囊括12項提名，同奪金馬影后的周冬雨及馬思純，在金像獎中再次較量；影帝方面，憑《樹大招風》角逐的林家棟迅即被捧成大熱人選，可望首度染指金像影帝。
《七月與安生》繼揚威金馬獎後，在金像獎繼續成焦點，共獲12項提名，其中包括最佳電影、最佳導演、最佳女主角、最佳編劇及新晉導演等，領先十個提名的《寒戰II》，非常厲害。名單中，影帝「候選人」最吸睛，事關上屆憑《踏血尋梅》攞影帝的郭富城，今年未能靠《寒戰II》獲提名，反而「讓路」同片的梁家輝，但家輝不單要應付首獲提名的《一念無明》余文樂、《脫皮爸爸》吳鎮宇，再有《樹大招風》雙主角林家棟與任賢齊，家輝封帝未必穩勝。
城城無份角逐唔失望
昨日有份揭曉入圍名單的城城，直言今年無提名亦不覺得失望，「提名與否都係同一個心態去工作，我係個好努力嘅演員，好用心去演好每部戲嘅角色，上年已經攞咗（金像影帝），今年無提名都唔緊要，但係我會向每一位入圍者衷心祝福佢哋有好嘅成績。」問到城城睇好誰，他就直言最近忙於拍攝《女兒國》，未有時間欣賞其他作品，故不打算評論了。如此忙碌，女友Moka可有投訴無時間陪她？城城破例講了幾句，「最緊要體諒同包容，明白我嘅工作狀況，好多謝佢。」
星爺激罕獲4提名
至於個人競逐就以周星馳最犀利，個人已獲四項提名，分別是最佳導演、最佳編劇、最佳電影及最佳原創電影歌曲。而影后則有《幸運是我》惠英紅、《大手牽小手》鮑起靜及《北京遇上西雅圖之不二情書》湯唯等好戲之人。最佳男配角入圍的亦全是老戲骨，包括《一念無明》曾志偉、《導火新聞線》吳孟達、《點五步》廖啟智、《北京遇上西雅圖之不二情書》秦沛，年資比較淺的姜皓文亦有多年演戲經驗，料必有龍爭虎鬥。
準影帝影后有嘢講
吳鎮宇：因為《脫皮爸爸》係講香港嘅轉變，用一個阿伯嘅不同年齡去代表香港轉變，幾得意、幾好玩。
林家棟：無論結果係點，已經證明到過去努力係無白費，可以同小齊一齊行紅地氈，真係好開心！
余文樂：好開心，係零的突破呀！導演、老爺曾志偉仲係第一時間打畀我，開心係因為付出好多。
任賢齊：真係好意外啊，我哋嘅電影，男主角佔咗兩個席位，家棟加油！我有提名已經好滿足。
湯唯：謝謝香港金像獎的驚喜！知道提名我就抱着（女兒）小Summer親了一口來祝賀。
惠英紅：真係好開心，得到自己地區一個認同，得到提名我已經當贏咗，我希望平靜度過（頒獎禮）呢一日，到時扮靚啲坐一日，享受咁大嘅盛會。
鮑起靜：開心！感謝！如在夢中！雖然對手強勁！自己取得好成績就好了！
周冬雨：謝謝安生帶來不斷驚喜，也恭喜《七月與安生》有這麼多好成績。
馬思純：為我們整個電影而高興。謝謝金像獎給《七月與安生》那麼多美好的肯定。幸運且感恩。
採訪︰Pauline
編輯：林梓添
設計：梁政敏