馬斐森離任 帶貓狗移民蘇格蘭

噚日港大春茗，焦點當然落喺上個禮拜宣布咗辭職嘅港大校長馬斐森喇！佢發言時話今年係最後一次主持港大春茗，覺得好傷感，不過佢之後仍會返來探朋友，亦會做香港同蘇格蘭之間嘅橋樑。佢又特別請咗佢太太同愛犬Darcy出來，Darcy仲好應節咁掛咗隻雞公仔喺心口！Darcy出年都要跟住校長返蘇格蘭，校長話會搵寵物移民公司幫手搞手續，仲透露自己其實亦係「貓奴」，到時會幫貓貓同Darcy一齊搞「移民」。

最後一年主持春茗，馬斐森都搞搞新意思，講講下佢突然從衫袋拎咗把鉸剪出來，原來係要即場表演苦練多時嘅中國傳統剪紙工藝！在場嘅傳媒都好期待，終於佢打開張紅紙，可能黛安無乜想像力，驟眼一睇以為佢剪咗片雪花，但佢解釋其實由圓心放射出來的「春」字，寓意迎春接福！