西環一田開幕啦！ 店長Kitty親自迎賓

西環一田百貨噚日正午12點開幕，黛安帶住爹哋、媽咪去咗新店朝聖。未開門已有800人喺門外等候，勁熱鬧！大家都圍住舖頭ICON、着住一田制服嘅Hello Kitty影相打卡。作為第一間進駐港島區嘅分店，一田靚女CEO黃思麗（Susanna）早已預告會將西環店打造成全球首間Hello Kitty期間限定主題超市。

新店格局分上、下兩層，上層係超市，下層就有零食、酒品及精品賣，總面積約有1萬呎，更打破傳統超市嘅陳列模式，用「Mix & Match」排列，例如意粉配橄欖油和醬料、啤酒配乾果、薯片，方便大家一揾就揾到。

Hello Kitty店長為隆重其事，仲親自落舖迎賓。黛安喺舖頭裏面發現大量Hello Kitty主題產品，譬如印有Kitty頭像嘅蘋果、壽司、卷蛋等食品，樣樣都好想帶番屋企啊，聽講頭3個鐘，Hello Kitty圍裙已賣曬，人均消費有300蚊以上！難怪Susanna都話相信Sanrio郊應下，西環店的生意會較其他分店多5％。她又透露，今年中一田將會喺將軍澳東港城開分店，該處面積仲大過西環店，有成3萬呎，又會進駐葵芳，睇嚟佢同一田嘅同事今年都有排忙呢！

今次一田同Hello Kitty合作嘅期間限定店只有三個月，過咗5月31日之後就會恢復原貌，想買Kitty精品就要快手啦！