假日好去處 曼聯名宿教踢波 VR遊戲睇梵高名畫

復活節想一家大細玩得開心，除咗行街睇戲食飯，原來仲有寓運動於藝術既新選擇！黛安講緊嘅係馬會年度社區盛事「同心同步同樂日」﹗今年同樂日會喺復活節期間（4月14日至16日）一連3日喺沙田馬場同彭福公園舉辦，設五大主題、共十個活動區，有70款益智活動同遊戲玩。本地雕塑大師曾章成仲會帶領1,000人一齊挑戰健力士世界紀錄，開班搞全球最大規模雕塑課。

講到最好玩，莫過於今年新引入嘅虛擬實境（VR）活動區，玩家可透過VR遊戲，探索荷蘭著名畫家梵高藝術世界嘅「尋找梵高」，打機之餘都夠晒文青，亦可誘發小朋友創意同想像。之後仲可去新設嘅「同習大師作」區，即場「拜師」跟藝術大師學火龍紮作、花牌製作、傳統剪紙及麵塑藝術等，想偷師話咁易。

跳繩隊重演世界紀錄

但新世代小朋友剩係叻一瓣唔夠㗎，要文武雙全先至威威。今年嘅「同追足球夢」區會增加親子足球環節，等家長同細路一齊披甲上陣踢波。曼聯一代「鋼門」舒米高仲會親身同參加者切磋球技；香港跳繩代表隊亦會到場大顯身手，重演締造4 x 45秒交互繩速度跳接力世界紀錄嘅真功夫。