黛安
黛安

20個「鮮為人知藝術秘點」 旅發局帶你藝遊香江

發佈時間: 2017/03/02

20個「鮮為人知藝術秘點」 旅發局帶你藝遊香江

嚟到充滿藝術氣息嘅3月,又係時候介紹畀大家有咩好去處喇!黛安噚日同旅發局公關姊妹講起,佢哋都向外推廣3月係「香港藝術月」,而適逢今年香港回歸20周年,旅發局特別加入同20有關嘅元素,例如向旅客推介香港20個精采藝術活動同好去處,好似第45屆香港藝術節、滙聚各個國家及地區逾200家頂級藝廊嘅巴塞爾藝術展、展出多位國際藝術大師作品嘅Art Central等,真係去到邊度都可以靈感處處呀!

街頭塗鴉 估值過百萬

今年旅發局特意同路透社合作,揀咗20張最能表達「香港鮮為人知的藝術秘點」嘅相,包括由傳統工業區變身、有唔少藝術團體同藝廊進駐嘅文青新據點黃竹坑,遍布中上環、深水埗嘅街頭塗鴉等,希望旅客從唔同角度感受香港獨特嘅藝術氣氛。

齋睇藝術,可能未必明白藝術品蘊含嘅意思,所以旅發局仲推出導賞團,逢星期日會有中環塗鴉藝術遊。你知唔知荷李活道一帶牆上有幅看似不經意嘅塗鴉,價值竟高超過100萬?一班專業藝術嚮導屆時將帶大家穿梭街頭巷尾,發掘鮮為人知嘅故仔。

值得一提嘅係,今年增設「畢打行畫廊遊」,畢打行建於1920年代,係畢打街僅存嘅二戰前建築,但依家就搖身一變國際知名畫廊集中地,嚮導會介紹當中來龍去脈,想知多啲就要留意旅發局網頁喇!

撰文: 黛安 消息特靈八卦公關
欄名: 八卦名利場