體壇明星為單車隊打氣

黛安留意到，本港最近即將有多項體壇盛事舉行，今個星期六先有香港拳王曹星如大戰日本嘅對手向井寬史，而下個月12至16日香港單車館將會舉行嘅場地單車世錦賽！唔講唔知，原來呢個比賽屬於世界級賽事，級數僅次奧運會，到時約300名來自40個國家及地區嘅頂尖車手統統嚟到香港，競逐象徵世界冠軍嘅「彩虹戰衣」！香港係繼日本後，第二個成功申辦呢個比賽嘅亞洲城市，認真威水，真係期待「牛下女車神」李慧詩又再為港爭光！

中國香港單車聯會更邀請咗曾經喺2011年場地單車世界錦標賽15公里捕捉賽奪冠、披「彩虹戰衣」嘅郭灝霆為港隊打氣，佢透露近日轉戰科技界，分析數據強化運動員基礎訓練，幫佢地喺國際舞台再爭佳績。同場仲有一眾「世界冠軍級」體壇明星，包括「神奇小子」蘇樺偉、「四眼Cue后」吳安儀同「保齡神童」胡兆康，為香港單車隊打氣加油。大家到時一定要撑港隊！