Jamie Oliver烹飪班 下周五全球開教

周日天陰雨濕，但無損黛安逛太古坊農墟的雅興。場內巧遇《晴報》專欄作家陳嘉惠（Beatrice），她正為下周五（16日）的全球「為食起革命日」宣傳。

Beatrice是已故名廚陳東之女，自小與飲食結緣。06年英國廚神Jamie Oliver發起「Food Revolution（中譯為食起革命）」，提倡以個人力量影響世界，向身邊人介紹健康飲食，旋即獲得全球有心人響應。Beatrice三年前自薦為香港區大使，聯同幾個朋友推廣惜食及飲食健康，並獲藝人甄子丹夫婦成立的慈善機構「Go.Asia愛心起動」支持，活動愈做愈大。

250份廚神食譜 網上任睇

去年五月，Beatrice找來外籍小朋友扮Jamie參加長洲飄色巡遊，成功吸引鎂光燈追捕；今年她將Jamie的250份食譜譯成中文放上網，市民跟住煮就可輕鬆變廚神。伊人今個月仲會四圍演講，今日將走入中學，以高鈣及均衡飲食策略，教男同學變到「星星王子」都敏俊咁高大；另又與食肆及農墟合作，推出不同主題的烹飪班、種植班，畀幾百蚊即可參加，詳情可登入http://frd.asia。

Beatrice話下周五晚香港時間九點，「教主」Jamie將會直播全球最大型烹飪節目，教整好味又有營養的彩虹沙律卷，希望打破健力士世界紀錄，成為24小時內全球最多人一起參與的烹飪課。如此盛事，黛安怎能錯過？