三中學女生揚威海外 畫作奪國際青年節獎

再有港生為香港爭光啦！3名中學生最近參加印度的年度國際藝術盛事「國際青年節」，擊敗來自新加坡、馬來西亞、泰國等21個國家，逾4,800名、10至18歲的青少年藝術家，分別憑出色的畫作獲得「蒙特梭利藝術全球獎」的冠、季軍及優異獎呀！可喜可賀！恭喜晒！

繪出美好時光

今屆比賽主題係色彩繽紛的季節，就讀庇理羅士女子中學中四嘅鄭喬心，利用色彩絢麗嘅塑膠彩畫出《最美麗的時刻》，獲得全場最高榮譽的冠軍，亦都係比賽舉行3年以來第一位港生奪冠，好叻女呀！喬心話6年前開始學畫畫，今次嘅作品花咗一個月準備，描繪過去一年同家人、朋友喺海灘玩樂、開派對、燒烤最愉快嘅情景，「現今幾乎所有人都用電話影相，我希望透過畫畫將最美好嘅時光景色留住」。

獲比賽季軍、16歲的葉沁怡榮繪畫嘅《青春無限》，「畫中一班年輕人勇闖激流，顯示自己享受玩樂的同時，綻放着閃耀光芒」，原來今次沁怡刻意喺畫中加入濺出嘅水花，營造澎湃效果，寓意年輕人是充滿朝氣活力，享有豐盛的人生。至於得到優異獎、讀中五嘅劉子晴，今次第一次獲國際大獎，覺得好驚喜同興奮呀！