一田東九開店 莊偉忠：有新嘢玩

一田百貨CEO莊偉忠（Daniel）去年帶住班同事，於荃灣、屯門及旺角連開三間分店，全部大旺收場。昨日他於沙田做推廣，唔使人問就自爆年底於東九龍再下一城，開間32,000呎的第七分店，並聲言「有新嘢玩」。Daniel點都唔肯透露確實地址，有人就估是新地旗下的將軍澳中心，唔知準唔準呢？

Daniel曾講過，目標於全港開夠12間一田。有人問他發展藍圖是否包括港島區，他直言「發夢都恨入港島！」但一切要等機會喎。

有睇新聞的人都知道，最近一田花了一億元，在大埔買下四萬多呎的物流中心。黛安昨向Daniel請教中心的實質用途，他說主要用來做乾貨倉和食物加工及中央處理工場。

黛安聽Daniel講，現時各分店都有自己的食品處理部，增設工場後會統一送到大埔中央處理，最多可令成本降低20％。雖然另邊廂又多了物流、儲存等開支，但他有信心最終有錢慳，可以減價回饋消費者。

鋪路推自家品牌

言談間，Daniel透露接收工場後，擬推出自家品牌產品，例如賣下自己溝的穀類食品，仲話兩年前已叫副手、一田市場助理總經理謝素嫻（Rebecca）幫自家品牌改名。工場五月先至交吉，最快九月投入運作。話唔定一田東九店的「新嘢」就係一田的自家產品。