天文台台長拋磚引玉 徵集香港颱風相

天文台噚日搞聚餐，講今年天氣預測，黛安有幸出席。出名愛收藏同天氣相關歷史物品嘅天文台台長岑智明，帶咗佢啲「寶貝」嚟同大家分享，原來係一張拍攝於上世紀20、30年代嘅九龍維港全景，同1973年嘅風暴訊號表！台長笑話︰「唔好睇張全景相咁舊，其實睇到晒3個扯波。」，黛安就「搲爆頭」都唔明咩叫「扯波」？台長解畫，即係掛上風暴訊號嘅俗語，一張相內見到3個訊號掛起係好罕見，仲大爆佢花咗4位數字買番嚟，果然係愛古物之人呀！

講起珍藏，台長就話天文台現正徵集香港昔日嘅颱風相、影片、聲音檔同文章，特別係電台廣播颱風警報訊號嘅聲音檔、颱風襲港同颱風過後損毀情況嘅錄影片，如果你都想公諸同好，記得5月22號前將珍品交到天文台喇！

另外，天文台會同香港郵政合作，喺6月13號推出以數字颱風訊號做主題嘅郵票及首日封，希望增加公眾對颱風嘅了解。