【聲明】港生活網站並無進行電話推廣活動

天文台台長拋磚引玉 徵集香港颱風相

發佈時間: 2017/03/24

天文台噚日搞聚餐,講今年天氣預測,黛安有幸出席。出名愛收藏同天氣相關歷史物品嘅天文台台長岑智明,帶咗佢啲「寶貝」嚟同大家分享,原來係一張拍攝於上世紀20、30年代嘅九龍維港全景,同1973年嘅風暴訊號表!台長笑話︰「唔好睇張全景相咁舊,其實睇到晒3個扯波。」,黛安就「搲爆頭」都唔明咩叫「扯波」?台長解畫,即係掛上風暴訊號嘅俗語,一張相內見到3個訊號掛起係好罕見,仲大爆佢花咗4位數字買番嚟,果然係愛古物之人呀!

講起珍藏,台長就話天文台現正徵集香港昔日嘅颱風相、影片、聲音檔同文章,特別係電台廣播颱風警報訊號嘅聲音檔、颱風襲港同颱風過後損毀情況嘅錄影片,如果你都想公諸同好,記得5月22號前將珍品交到天文台喇!

另外,天文台會同香港郵政合作,喺6月13號推出以數字颱風訊號做主題嘅郵票及首日封,希望增加公眾對颱風嘅了解。

撰文: 黛安 消息特靈八卦公關
欄名: 八卦名利場