黛安
黛安

梵高名作 活現海港城

發佈時間: 2013/07/16

梵高名作 活現海港城

海港城正門長樓梯換上一襲向日葵新裝,朝氣勃發。對藝術有認識嘅朋友,相信一眼就睇出,呢幅係藝術大師梵高嘅名畫作品《向日葵》。

黃色巨鴨啱啱先闊別香江,海港城話咁快搵咗阿姆斯特丹梵高博物館合作,喺「海港城‧美術館」開辦「活現RELIEVO」展覽,將五幅以三維高端技術仿製嘅梵高名畫,帶到香港作首次展覽。黛安噚日獲邀出席開幕禮,並有幸認識梵高嘅曾姪孫Vincent Willem van Gogh。

Vincent係梵高博物館董事會顧問,噚日黛安問佢,梵高芸芸作品中,點解揀出呢五幅嚟香港參展,佢解釋話,因為呢幾幅畫都代表住梵高每一個重要嘅創作階段,而當中佢最鍾意曾叔祖父1890年畫下嘅《盛開的杏樹》,認為色彩鮮艷,最能代表梵高喎。

仿製品像真度高

雖然呢幾幅係仿製品,但無論用色、亮度、質感同比例等每項細節,都接近原作,仲得到梵高博物館品鑑認證。聽講負責製作嘅富士公司,一共用咗七年進行細微調校,連貼喺原作背後、記錄畫作借出次數嘅貼紙同印章都模仿到十足,認真細心。

噚日黛安亦遇另一名正發展梵高品牌生意嘅姊妹麥詠欣(Vivian),佢手上戴住嘅瑞士腕錶,錶底竟暗藏梵高畫作,原來此錶乃紀念這位藝術大師160歲生辰而推嘅限量作。Vivian同黛安講,現時忙於籌備明年喺京滬港澳四地,舉行梵高真蹟畫展,細節仲傾緊,作為梵高迷嘅黛安拭目以待。

撰文: 黛安 消息特靈八卦公關
欄名: 八卦名利場